ياعني, بۇگىن وبلىستىق ءماسليحاتتىڭ دەپۋتاتى مانداتىن № 11 وبلىستىق سايلاۋ وكرۋگىنەن سايلانعان « ۇلى وردا» جشس-ءنىڭ پرەزيدەنتى قايرات سۇلەيمەنوۆ, № 35 سايلاۋ وكرۋگى وكرۋگى بويىنشا «SAURANgroup» جشس-ءنىڭ كەڭەسشىسى ءابدىراشيت وماروۆ, № 49 سايلاۋ وكرۋگى بويىنشا «حاميت» اوك باسقارماسى توراعاسى باقىتجان سەرمانيازوۆ, № 50 سايلاۋ وكرۋگى بويىنشا قازاقستان ينجەنەرلى-پەداگوگيكالىق «حالىقتار دوستىعى» ۋنيۆەرسيتەتىنىڭ رەكتورى رابيعا قۋاتبەكوۆا الدى.
سەسسيا جۇمىسىنا وبلىس اكىمى, وبلىس اكىمدىگىنىڭ مۇشەلەرى, اۋماقتىق سايلاۋ كوميسسياسىنىڭ توراعاسى, قالا جانە اۋدان اكىمدەرى, قۇقىق قورعاۋ ورگاندارى مەن اۋماقتىق دەپارتامەنت پەن باسقارما باسشىلارى قاتىستى.
وبلىستىق ءماسليحاتتىڭ دەپۋتاتى قاينار اباسوۆتىڭ توراعالىعىمەن وتكەن سەسسيا وتىرىسىندا 4 ماسەلە قارالدى. كۇن تارتىبىندە كوتەرىلگەن ماسەلەلەر بۇعان دەيىن تۇراقتى كوميسسيا وتىرىسىندا تالقىلانعاندىقتان سەسسيادا قارالعان ماسەلەلەر دەپۋتاتتار تاراپىنان ءبىراۋىزدان قولداۋ تاۋىپ وتىردى.
ءماجىلىس بارىسىندا وبلىس اكىمى ج.تۇيمەباەۆ سالالىق مادەنيەت, سپورت جانە اقپارات قىزمەتكەرلەرى كاسىپتىك وداعىنىڭ «ەڭبەك داڭقى» توسبەلگىسىمەن وبلىستىق ءماسليحاتتىڭ دەپۋتاتتارى سەرىكجان سەيتجانوۆتى, داۋرەن احمەتوۆتى, جامالبەك شارىپبەك پەن نۇرالى ابىشەۆتى, تالعات بايماحانوۆ جانە ۋاليحان راحيەۆالاردى ماراپاتتادى. وسىنداي توسبەلگىنى ءماسليحات حاتشىسى ق.بالابيەۆ وبلىس اكىمىنە تاقتى.
بۇدان بولەك, وبلىستىڭ دامۋىنا ەرەكشە سىڭىرگەن ەڭبەگى مەن قوعامدىق ومىرگە بەلسەندى قاتىسقانى ءۇشىن وڭتۇستىك قازاقستان وبلىسىنىڭ قۇرمەت گراموتاسىمەن جانە ءوڭىردىڭ الەۋمەتتىك-ەكونوميكالىق جانە قوعامدىق-ساياسي دامۋىنا سىڭىرگەن ەڭبەگى ءۇشىن وبلىستىق ءماسليحاتىنىڭ گراموتاسىمەن جالپى جەتى ازامات ماراپاتتالدى.
سەسسيا جۇمىسىن قورىتىندىلاعان ج.تۇيمەباەۆ بارشا دەپۋتاتتاردى جاڭاشا باعىتپەن, جاڭاشا كوزقاراسپەن جۇمىس ىستەۋگە شاقىردى.
«ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى مەن حالىققا ارناعان جولداۋىن حالىققا تۇسىندىرەتىن سىزدەرسىزدەر. سوندىقتان ءاربىرىڭىز اتالعان قۇجاتتى قايتا قاراپ, تالداپ شىعىڭىزدار. قازىرگى ەكونوميكالىق دامۋدىڭ ناتيجەسىنە بايلانىستى ءبىز جاڭاشا باعىتپەن, جاڭاشا كوزقاراسپەن جۇمىس ىستەۋىمىز قاجەت»,-دەدى وبلىس اكىمى.
ون ايدىڭ قورىتىندىسى بويىنشا وڭىردە اۋىل شارۋاشىلىق, ءوندىرىس سالاسى مەن كووپەراتيۆتەردىڭ اشىلۋى جانە ينۆەستيتسيا تارتۋ, قۇرىلىس پەن مەملەكەتتىك جەكەشىلىك ارىپتەستىك بويىنشا وبلىسىمىز رەسپۋبليكادا كوش ىلگەرى ەكەنىن ايتقان ءوڭىر باسشىسى, بىرلەسكەن جۇيەلى جۇمىستاردىڭ ارقاسىندا وسى جىلدى جاقسى كورسەتكىشپەن اياقتايتىنىمىزعا سەنىمدىمىن دەدى.
